Luhkewakon ‘sotumasik

Luhkewakonol etololuhkatomuhtit SQOTESOL nihtol wiciw latuwewakon apaciptasik naka eleyimok apc ewehkasik ‘ciw Wolastoqiyik.

Latuwewakon apaciptasik nit latuwewakoney naka elawsultimok eluwehkasikil oc okimqotul ‘ci ewehkasik latuwewakon weci tetpiw wehkehtit skicinuwatuwahticik. Eleyimok apaciptasik tena toli qeci apaciptasu – skicinuweyal amalholukhotimkil, kiluwahtasikil, kecicihtasik, naka psiw ekimqakil.

Yuhtol luhkewakonol ‘t-ihiniya wicuhketuweyal wehkewakonol naka tan eli miluwehkasikil.

Wiciw: kompiyuhtawok kehkitikon

Yut luhkewakon ‘t-ihiniya pomi pileyawik wicuhketikonol nonasik, kehkitasik, naka ewehkasik wolastoqey latuwewakon. Eyik, kisihtahsik naka wolitahatomuhtit nihkanokehkimsulticik naka elewestuhticik wolastoqey, kisi psonasu polecomoney naka ikolisomaney naka iyu ‘ci toqiw ewikhikeweyal (Teeter naka Newell-Hale).

Wicuhketikonol kisihtasuwol weci wicuhketomuhtit latuwewakon kehkitasik naka keqseweyal piluweyal weci qinte-te nonasik wolastoqey latuwewakon. Kompiyuhta tena meciciw iyu naka kiswehkasu pawatok wen ‘ciw wolastoqey latuwewakon: etoli witokehkimsulticik, yukt skat kisi naci witokehkimsultihtiq, elakumahtit, naka nutokehkikemulticik.

Mawolukhoticik

Man kisi wicipunok

Patrimoine canadien/Heritage Canada. Skicinuwi Latuwewakonol Miltek – Skicinuwi Latuwewakonol Eleyimok Eluhkatasik

Latuwewakon elitahatasikil naka keqseweyal ‘ciw Wolastoqiyik

Yut luhkewakon oc ‘t-olihtun psiw elawsultimok ewehkasik wolastoqey latuwewakon weci nuhsukomuhtit eluwehkasikil (ewehkasik, etutawotik, pcitahkasik, etc.).Tan Wolastoqiyik naka skat skicinuwok ‘t-olitahatomoniya wolastoqey naka nutewestuhtilit? Tan petawotu (eluwehkasik, etutawotik, litposuwey, eleyimok, etc.) ‘ciw yut wahka ewehkasik latuwewakon? Tan li memte Nouveau-Brunswick/New Brunswick naka Kanata? Mehsi skat minuwawsuwewik wolessinuhk? Yut luhkewakon oc ‘t-olapotomonol elitahatasikil naka eliwihtasikil ‘ci wolastoqey weci 1) skat wen wolamsotomuhk latuwewakon naka nutewestuhtitit, naka 2) ‘sotasik tan wecessik eli nonasik wolastoqey latuwewakon. Nonaqsultitit wikultitit Wolastokuk (papehcimut, ‘pomawsuwakonuwa), nit oc eli ‘sotumasik litahasuwakonol naka psi keq weskuhutasik skicinuwihkuk, naka yukt etoli skuhutomuhtit (nuspehpolol, kisuwikhasikil), nit oc eli kisi lapotasik qocomiw eli nomihtutit skicinuwihq, tuciw nuspehpolol kakehs itomuhtitit tan elitahasultitit nit wikulticik.

Mawolukhoticik

Man kisi wicipunok

Université de Moncton, (Espokehkitimok Moncton), (Espokehkitimok Moncton), Faculté des études supérieures et de la recherche (Toleyak weci sapiyamok kehkitikon naka meskasik), Programme de soutien à la recherche autochtone (Skicinuwey meskasik wicuhketikon).

Podcast: Kehkimsultine wolastoqey latuwewakon

Eli puwahtasik yut kekesk koti ‘sotumasik oc weci koti nonasik wolastoqey latuwewakon nit polecomoneyal skicinuhwihkul Wolastokuk (Matawaskiye naka Wahsipekuk). Wecessik itomuhtitit toleyak yuhtol skicinuwihkul etoli wahkac ona apaciptuhtit latuwewakon, ‘koti ‘sotumoniya tan eyultitit Wolastoqiyik naka maqenomuhtitit tan eluwehkasik latuwewakon: tan eluwehkasik, keq conehliht weci apaciptasik, keq mehsi wisokokimqok ‘ciw eleyimok, etc. Malom-ote oc pskasuwol cipotu asitewtomuwakonol ‘ciw papehcikesuwakon “Mehsi nonasik wolastoqey pemkiskahk?”

Mawolukhoticik

Man kisi wicipunok

Université de Moncton, (Espokehkitimok Moncton), Faculté des études supérieures et de la recherche (Toleyak weci sapiyamok kehkitikon naka meskasik), Programme de soutien à la recherche autochtone (Skicinuwey meskasik wicuhketikon).