Lohkewakən ‘sətomasik

Lohkewakənəl etələlohkatəmohtit SKWӘTESӘL nihtəl wiciw latowewakən apaciptasik naka eleyimək apc ewehkasik ‘ciw Wəlastəkwiyik.

Latowewakən apaciptasik nit latowewakəney naka elawsoltimək elowehkasikil əc əkimkwətol ‘ci ewehkasik latowewakən weci tetpiw wehkehtit skicinowatowahticik. Eleyimək apaciptasik tena təli kweci apaciptaso – skicinoweyal amalhəlokhətimkil, kilowahtasikil, kecicihtasik, naka psiw ekimkwakil.

Yohtəl lohkewakənəl ‘t-ihiniya wicohketoweyal wehkewakənəl naka tan eli milowehkasikil.

Wiciw : kəmpiyohtawək kehkitikən

Yot lohkewakən ‘t-ihiniya pəmi pileyawik wicohketikənəl nənasik, kehkitasik, naka ewehkasik wəlastəkwey latowewakən.

Eyik, kisihtahsik naka wəlitahatəmohtit nihkanəkehkimsolticik naka elewestohticik Wəlastəkwey, kisi psənaso pəlecəməney naka ikəlisəmaney naka iyo ‘ci təkwiw ewikhikeweyal (Teeter naka Newell-Hale).

Wicohketikənəl kisihtasowəl weci wicohketəmohtit latowewakən kehkitasik naka kekwseweyal piloweyal weci kwinte-te nənasik wəlastəkwey latowewakən. Kəmpiyohta tena meciciw iyo naka kiswehkaso pawatək wen ‘ciw wəlastəkwey latowewakən: etəli witəkehkimsolticik, yokt skat kisi naci witəkehkimsoltihtikw, elakomahtit, naka notəkehkikemolticik.

Mawəlokhəticik

Man kisi wiciponək

Patrimoine canadien/Heritage Canada, Skicinowi Latowewakənəl Miltek – Skicinowi Latowewakənəl Eleyimək Elohkatasik

Latowewakən elitahatasikil naka kekwseweyal ‘ciw Wəlastəkwiyik

Yot lohkewakən əc ‘t-əlihton psiw elawsoltimək ewehkasik wəlastəkwey latowewakən weci nohsokəmohtit elowehkasikil (ewehkasik, etotawətik, pcitahkasik, etc.) Tan Wəlastəkwiyik naka skat skicinowək ‘t-əlitahatəməniya wəlastəkwey naka notewestohtilit? Tan petawəto (elowehkasik, etotawətik, litpəsowey, eleyimək, etc.) ‘ciw yot wahka ewehkasik latowewakən? Tan li memte Nouveau-Brunswick/New Brunswick naka Kanata? Mehsi skat minowawsowewik wəlessinohk? Yot lohkewakən əc ‘t-əlapətəmənəl elitahatasikil naka eliwihtasikil ‘ci wəlastəkwey weci 1) skat wen wəlamsətəmohk latowewakən naka notewestohtitit, naka 2) ‘sətasik tan wecessik eli nənasik wəlastəkwey latowewakən. Nənakwsoltitit wikoltitit Wəlastəkok (papehcimot, ‘pəmawsowakənowa), nit əc eli ‘sətomasik litahasowakənəl naka psi kekw weskohotasik skicinowihkok, naka yokt etəli skohotəmohtit (nospehpələl, kisowikhasikil), nit əc eli kisi lapətasik kwəcəmiw eli nəmihtotit skicinowihkw, tociw nospehpələl kakehs itəmohtitit tan elitahasoltitit nit wikolticik.

Mawəlokhəticik

Man kisi wiciponək

Université de Moncton (Espəkehkitimək Moncton), Faculté des études supérieures et de la recherche (Təleyak weci sapiyamək kehkitikən naka meskasik), Programme de soutien à la recherche autochtone (Skicinowey meskasik wicohketikən).

Podcast : Kehkimsoltine wəlastəkwey latowewakən

Eli powahtasik yot kekesk kəti ‘sətomasik əc weci kəti nənasik wəlastəkwey latowewakən nit Pəlecəməneyal skicinohwihkol Wəlastəkok (Matawaskiye naka Wahsipekuk).Wecessik itəmohtitit təleyak yohtəl skicinowihkol etəli wahkac əna apaciptohtit latowewakən, ‘kəti ‘sətoməniya tan eyoltitit Wəlastəkwiyik naka makwenəmohtitit tan elowehkasik latowewakən : tan elowehkasik, kekw cənehliht weci apaciptasik, kekw mehsi wisəkəkimkwək ‘ciw eleyimək, etc. Maləm-əte əc pskasowəl cipəto asitewtəmowakənəl ‘ciw papehcikesowakən « Mehsi nənasik wəlastəkwey pemkiskahk?”

Mawəlokhəticik

Man kisi wiciponək

Université de Moncton (Espəkehkitimək Moncton), Faculté des études supérieures et de la recherche (Təleyak weci sapiyamək kehkitikən naka meskasik), Programme de soutien à la recherche autochtone (Skicinowey meskasik wicohketikən).