Wicuhketikoney manikuwam

Etuci wisoki kolowok latuwewakon ‘cessu kisi mawolukhotimok.

Yuhtol wicuhketikonol ‘ciw wolastoqey latuwewakon naka psiw keq piluwey weci apaciptasik nihtol wisokokimqotul wehkewakonol ‘ciw nonasik latuwewakon. Weci peciptasik kosona keq piluwey, wikhomuwine nit

PMPortal

Nit Passamaquoddy-Maliseet Language Portal (Peskotomuhkati-Wolastoqewi Latuwewakoney Oqimut) kisihtutit Language Keepers (Latuwewakon Monuwehkehtit) luhkewakon nihkanatpat David A. Francis naka Robert M. Leavitt tuciw 2006. Mawi-punomoniya kolusuwakonol ‘ci kisi-nisi-latuwewakonewestuwey wikhikon Peskotomuhkati Wolastoqewi Latuwewakon / A Passamaquoddy-Maliseet Dictionary (Francis naka Leavitt, 2008), wiciw elewestuwewik. ‘Cel peciw ihwol elapotasikil naka PDF wikhikonol weci kisi woli ‘sotasik tan latuwewakon luhkewiw.

Latuwewakonol : ikolisomaney, wolastoqey

Wolastoqewatu!

Wolastoqewatu! nit kisitahahtomuhtit Wolastoqiyik Wahsipekuk skicinuwihq. Nohonul latuwewakonol ewehkasik weci wen kiniluwemut ‘t-okehkimsin wolastoqey nawiw polecomonatuwahticik nikt tehpu ewehkehtit yut latuwewakon naka ikolismanatuwemok. Iyu nuwewey latuwewakon kisi nute-wikhasik, naka tena metehtaqil kolusuwakonol weci kisuwehkiyin elewestuwon.

Latuwewakonol: polecomoney, ikolisomaney, wolastoqey

Skicinowato – Skicinuwatu

Skicinowato – Skicinuwatu, kisihtutit Wolastoqey latuwewakon kehkitasik mawlukhoticik, ihwol lewestuweyal wicuhketikonol ‘ciw nutokehkikemulticik wolastoqey. Woli nonasik lintuwakonol naka tetpihtaqil ihwol weci motehtaqok kisi psonasik nit Word wikhikon wiciw ewikhasik wolastoqey naka ikolisomanuwikhasik. Ewikhasik iyu ‘ci wolastoqey nisonul ewehkasikil eluwikhasik (Teeter naka Newell-Hale), tan ote yut pawatok nutokehkikemit.

Latuwewakonol : ikolisomaney, wolastoqey

Kehkimin

Nit Kehkimin pehkiw latuwewakoney ihtolokehkitimok apqotessuhpon toqakuwi-kisuhs 2022. Ote Eqpahak (NB) oloqiw, amsqahsewey wolastoqey pehkiw latuwewakoney ihtolokehkitimok. Piyemitahatasik elokehkitimok ‘cessu ktahkomiqok naka elitahatomuhtit ktahkomiq nutokehkimsulticik. Nit iyu kisi-pskasik kehkikemuwakon ‘ciw nutokehkimsulticik wisoki wasissulticik tokkiw nan etutopiyamok. Ehtahsi kehkitikon wiciye keq tepostasik wolastoqey.