‘Kolasihkolpən
SKWӘTESӘL nikt nocikhahsolticik mawohkacik nit Université de Moncton, campus d’Edmundston (Espəkehkitimək Moncton, təley Kapskohsisək) amskwahs kisihtasik 2020.
Nit skwətesəl nəstoməniya eli nitowik kəsəna ‘cel ehta cowi-leyik, weci skat ksihkahtowekw. Kenok tena kmihkolwemkonen psiw kekw kisi lessik. “Peskwən tehpo pokset nitowik” nit SKWӘTESӘL itəmowik.
Kəti wicohketəməniya, kweni ihik UNESCO Psiw skitkəmikw ‘kwətinsk kehsikətən ‘ciw skicinoweyal latowewakənəl (2022-2032), apaciptaso Wəlastəkwey latowewakən naka apaciyak eleyimək ‘ci Wəlastəkwiyik. Keti əllokhətihtit əc :
- təlihtoniya meskasik eleyimək tepitahatasik ‘ciw Wəlastəkwey latowewakən;
- wicohketəməniya Wəlastəkwiyik keti əllokhətitit ‘ciw latowewakən apacipatasik naka eleyimək mace wehkasik;
- ‘təlihtoniya naka ‘t-ihiniya kehkikemoweyal wicohketikənəl ‘ci Wəlastəkwey latowewakən wici skicino mawəlohkamahtit.
Mawohkacik nosohkəməniya eli pəmiyak Espəkehkitimək Moncton Comité d’éthique de la recherche avec des êtres humains de l’Université de Moncton, (Kiluwahtutit weci kcitomitahamut psi-wen), naka əllokhətowək tan eli pəmiyak Énoncé de politique des trois conseils : Éthique de la recherche avec des êtres humains – TCPS 2 (2018), ciliw ‘sanəkahte 9, « Kilowahtasik wiciw Skicinowək, Inuit naka Metis təleyak Kanata », ellohkewik tahalo « elihtasik eli sankewəlokhətimək ‘ci kilowahtasik witəlokhətitit Skicinowək » (EPTC 2 / TCPS 2, 2018).
SKWӘTESӘL spi-wəlasmhətowək ‘ci Pempawətasik, Kisehtasik, naka Tpeltasik (PCAP® / OCAP®) eli-pəmiyak Skicinowi Kinowehtasey Sakəmawasik Hal Centre de gouvernance de l’information des Premières Nations/First Nations Information Governance Centre).
Lahkokək elinakwək
Ewikhasik skwətesəl, li-minowiw skwət kisacowik weci apc maciyamkəlek, wecessik SKWӘTESӘL lahkokək. Nekwt acehtasik, ‘kəmasi nənasik, naka pehkitasik, ewikhasik wecessik sonhikənot ‘cel peciw cepehtasik elinakwək tahalo asowihtasik elahkokil. Yohtəl wiwənsikil ‘t-əlihtoniya asit lahkokək, li-minowiw eci-mətoweyik apaciptaso wəlastəkwey latowewakən.