Wicohketikəney manikowam
Nit Passamaquoddy-Maliseet Language Portal (Peskətəmohkati-Wəlastəkwewi Latowewakəney Әkwimot) kisihtotit Language Keepers (Latowewakən Mənowehkehtit) lohkewakən nihkanatpat David A. Francis naka Robert M. Leavitt tociw 2006. Mawi-ponəməniya kəlosowakənəl ‘ci kisi-nisi-latowewakənewestowey wikhikən Peskotomuhkati Wolastoqewi Latuwewakon [Peskətəmohkati Wəlastəkwewi] / A Passamaquoddy-Maliseet Dictionary (Francis naka Leavitt, 2008), wiciw elewestowewik. ‘Cel peciw ihwəl elapətasikil naka PDF wikhikənəl weci kisi wəli ‘sətasik tan latowewakən lohkewiw.
Latowewakənəl : ikəlisəmaney, wəlastəkwey
Wolastoqewatu! (Wəlastəkwewato!) nit kisitahahtəmohtit Wəlastəkwiyik Wahsipekok skicinowihkw. Nəhənol latowewakənəl ewehkasik weci wen kinilowemot ‘t-əkehkimsin wəlastəkwey nawiw pəlecəmənatuwahticik nikt tehpo ewehkehtit yot latowewakən naka ikəlismanatowemək. Iyo nowewey latowewakən kisi note-wikhasik, naka tena metehtakwil kəlosowakənəl weci kisowehkiyin elewestowən.
Latowewakənəl : pəlecəməney, ikəlisəmaney, wəlastəkwey
Skicinowato – Skicinuwatu, kisihtotit Wəlastəkwey latowewakən kehkitasik mawlokhəticik, ihwəl lewestoweyal wicohketikənəl ‘ciw notəkehkikemolticik wəlastəkwey. Wəli nənasik lintowakənəl naka tetpihtakwil ihwəl weci mətehtakwək kisi psənasik nit Word wikhikən wiciw ewikhasik wəlastəkwey naka ikəlisəmanowikhasik. Ewikhasik iyo ‘ci wəlastəkwey nisənol ewehkasikil elowikhasik (Teeter naka Newell-Hale), tan əte yot pawatək notəkehkikemit.
Latowewakənəl : ikəlisəmaney, wəlastəkwey
Nit Kehkimin pehkiw latowewakəney ihtələkehkitimək apkwətessohpən təkwakowi-kisohs 2022. Әte Ekwpahak (NB) ələkwiw, amskwahsewey wəlastəkwey pehkiw latowewakəney ihtələkehkitimək. Piyemitahatasik eləkehkitimək ‘cesso ktahkəmikwək naka elitahatəmohtit ktahkəmikw notəkehkimsolticik. Nit iyo kisi-pskasik kehkikemowakən ‘ciw notəkehkimsolticik wisəki wasissolticik təkkiw nan etotəpiyamək. Ehtahsi kehkitikən wiciye kekw tepəstasik wəlastəkwey.